ನಿನ್ನೆ ಏನಾಯ್ತು ಗೊತ್ತಾ??

ಆಫಿಸ್ ನ ಸ್ವಲ್ಪ ಕೆಲಸ ಮತ್ತು ಮಿತ್ರರೊಬ್ಬರು ಹೇಳಿದ editing ಕೆಲಸ ಮುಗಿಸಿದಾಗ ಮಧ್ಯಾಹ್ನದ 3.30 ಗಂಟೆ. ಏನಾದರೂ ಓದುವ ಅಂದರೆ ಸಿಕ್ಕಿದ್ದು ತೀರ್ಥರಾಮ ವಳಲಂಬೆಯವರ 'ಮೃತ ಸಂಜೀವಿನಿ'. ನಮ್ಮ ರಾಯರು ತೀರ್ಥರಾಮ ಅವರ ಫ್ಯಾನ್. ಅವರ ಎಲ್ಲ ಪುಸ್ತಕಗಳು ನಮ್ಮಲ್ಲಿದೆ. (ಒಂದನ್ನು ಮಾತ್ರ ಸ್ನೇಹಿತೆಯ ಮೂಲಕ ಚಕ್ರವರ್ತಿ ಸೂಲಿಬೆಲೆ ಯವರಿಗೆ ಕೊಟ್ಟಿದ್ದು ಅವರಿಗೆ ತುಂಬಾ ಇಷ್ಟ ಆಗಿದ್ದಕ್ಕೆ ಅವರಿಗೇ ಅದನ್ನು ಉಡುಗೊರೆ  ಆಗಿ ಕೊಟ್ಟು ಬಿಟ್ಟೆ- ಇದನ್ನು ಬರೆಯುವಾಗ ನೆನಪಾಯ್ತು. ಇನ್ನೊಂದು ಪ್ರತಿಯನ್ನು  ತಂದು replace ಮಾಡಬೇಕು :-)) ಮೊನ್ನೆ ಅಂಕಿತಾಗೆ ಹೋದಾಗ ಇನ್ನೊಂದಿಷ್ಟು ಪುಸ್ತಕ ತಂದಿದ್ವಿ. ಅದರಲ್ಲೊಂದು ಈ ಪುಸ್ತಕ.

ತೀರ್ಥರಾಮ ಅವರ ಪುಸ್ತಕ ತಂದ ಕೂಡಲೆ ನಾನು ಅದರ ಹಿಂಪುಟ ಓದಿ, ಅದರೊಳಗಿನ ಚಿತ್ರಗಳನ್ನು ನೋಡಿ ಇಡುವುದು ಮಾಮೂಲು.ಅವರ ಬರಹಗಳಿಗೆ ಅವರೇ ರೇಖಾಚಿತ್ರ, ಮುಖಪುಟ ಎಲ್ಲ ಸಿದ್ದಪಡಿಸುತ್ತಾರೆ. ಸಿಕ್ಕಾಪಟ್ಟೆ ಟ್ಯಾಲೆಂಟಡ್ ಮಾತ್ರ ಅಲ್ಲ ಬರಹದ ಕಲೆ ತುಂಬಾ ಚೆನ್ನಾಗಿ ಸಾಧಿಸಿದೆ. ಸುಮ್ನೆ diagonal reading ಮಾಡಿ impress ಆಗಿದ್ದೇನೆ. ಅವರ ಪುಸ್ತ್ಕಕಗಳನ್ನೆಲ್ಲ ನನಗೆ 45 ಆದ ನಂತರ ಓದಲು ಪ್ರಾರಂಭಿಸುತ್ತೇನೆಂದುಕೊಂಡಿದ್ದೇನೆ . ಆದರೆ ಈ ಪುಸ್ತಕ ಓದಿಸಿಕೊಂಡು ಹೋಯ್ತು. ಓದ್ತಾ ಮಧ್ಯದಲ್ಲಿ ಮಕ್ಕಳಿಗೆ ಬಾಸುಂದಿ ಮಾಡಿಕೊಡುತ್ತೇನೆಂದು ಪ್ರಾಮಿಸ್ ಮಾಡಿದ್ದು ನೆನಪಾಗಿ ದಪ್ಪ ತಳದ ಪಾತ್ರೆಯಲ್ಲಿ ಹಾಲನ್ನು ಹಾಕಿ ಗ್ಯಾಸ್ ಮೇಲಿಟ್ಟು ಬಂದೆ. ಇನ್ನು ಕೆಲವು ಪುಟಗಳನ್ನು ಓದುವಷ್ಟರಲ್ಲಿ ಅಲ್ಲೆ ಕುಳಿತಿದ್ದ ನಿಹಾ, 'ಅಮ್ಮ, ನನಗೆ ಪೆಡಿಕ್ಯೂರ್ ಮಾಡ್ತೀಯಾ ಅಂತ ಕೇಳಿದ್ಲು. ನನಗೆ ಇಷ್ಟ ನನ್ನ ಮನೆಯವರಿಗೆಲ್ಲ ಪೆಡಿಕ್ಯೂರ್ ಮಾಡೋದು. ಸರಿ  ಟಬ್ ನ ಉಗುರುಬೆಚ್ಚಗಿನ ನೀರಿನಲ್ಲಿ ಸ್ವಲ್ಪ ಶ್ಯಾಂಪು ಹಾಕಿ ಅದರಲ್ಲಿ ಸ್ವಲ್ಪ ಬಾತ್ salt ಬೆರೆಸಿ ನಿಹಾಗೆ ಅದರಲ್ಲಿ ಕಾಲು ಇಳಿಬಿಡಲು ಹೇಳಿದೆ. ಸಿಸ್ಟಮ್ ನಲ್ಲಿ ಕಿಶೋರಿ ಅಮೋನ್ಕರ್ ಅವರ 'ಸಹೆಲಾ ರೆ' ಹಾಕ್ಕೊಂಡಿದ್ದೆ.

"ಅಮ್ಮ, ನಿನಗೆ ಕಿಶೋರಿ ಅಮೋನ್ಕರ್ ಇಷ್ಟ ಆಗುತ್ತಾರಾ?"

ನಾನು - ಹೂಂ. ನಿನಗೆ??

"ಅವರದ್ದು nasal ವಾಯ್ಸ್. ನನಗದು ಅಷ್ಟು ಇಷ್ಟ ಆಗಲ್ಲ'

ನಾನು- 'ನೀಹಾ ಮೊನ್ನೆ ಅಶ್ವಿನಿ ಭಿಡೆ ಕಾರ್ಯಕ್ರಮ ಚೆನ್ನಾಗಿತ್ತಂತೆ, ರವೀಂದ್ರ ಫೋನ್ ಮಾಡಿದ್ರು. ನಾವು ಆ ಬಂಡಲ್ ನಾಟಕಕ್ಕೆ ಹೋಗುವುದಕ್ಕಿಂತ ಅಶ್ವಿನಿ ಭಿಡೆ ಕಾನ್ ಸರ್ಟ್ ಎಟೆಂಡ್ ಮಾಡಬಹುದಿತ್ತು ನೋಡು."
ನಿಹಾ ತನ್ನ economics assignment ಮಾಡ್ತಾ ಕೂತಳು.

ನಾವು ಹೋಗಿದ್ದು the gossips of 47 ಎನ್ನುವ ಹಿಂದಿ ನಾಟಕಕ್ಕೆ. ಸದತ್ ಹಸನ್ ಮಾಂಟೋ ರವರ ಸಣ್ಣ ಕತೆಗಳನ್ನು ಆಧರಿಸಿದ ನಾಟಕ. ಆದರೆ ಕತೆಗಳಲ್ಲಿನ ಪಂಚ್ ನಾಟಕದ ಮುಖೇನ ನೀಡುವಲ್ಲಿ ಆ ತಂಡ ವಿಫಲವಾಯಿತು. ಯಾವುದೇ ಹಿಂದಿ ಶೋ ನಾವು ರಂಗಶಂಕರದಲ್ಲಿ ಈ ಹಿಂದೆ ನೋಡಿರಲಿಲ್ಲ. ಅದಕ್ಕೆ ಹೋಗಿದ್ವಿ. ಪ್ಲಸ್, ನಿಹಾಳ ಫ್ರೆಂಡ್ ಮತ್ತು ತಂದೆ ತಾಯಿ ಕೂಡ ಬರುವವರಿದ್ದರು. ಖುಶಿಯಾಯ್ತು ನನಗೆ ಅವರ ಜತೆ ಹಿಂದಿಯಲ್ಲಿ ಸಂಭಾಷಿಸಲು. ಫ್ರೆಂಡ್ ತಂದೆಗೆ Geological survey of India ದಲ್ಲಿ  ಕೆಲಸ. ಕುಮಾರಕೄಪಾ ರೋಡ್ ನಲ್ಲಿ ಮನೆಯಂತೆ. ಹಿಂದಿನ ಸಲ ಅವರು 'ಬಿಖರೆ ಬಿಂಬ್' ನಾಟಕಕ್ಕೆ ಬಂದು ಟಿಕೆಟ್ ಸಿಗದೆ, ಮಳೆರಾಯನ ಕೃಪೆಯಿಂದಾಗಿ, ನಾಟಕ ನೋಡುವವರು ನಾಟಕ ನೋಡಿ ಹೊರಗೆ ಬಂದರೂ, ಇವರು ಅಲ್ಲೇ ಸಿಕ್ಕಿ ಹಾಕಿಕೊಂಡಿದ್ದನ್ನು ಶೇರ್ ಮಾಡಿದರು.

'ಆಪನೆ 'ಪಾ' ಫಿಲ್ಮ್ ದೇಖಿ ಹೈ? ಉಸ್ಮೆ ಜೋ ಮಾ ಕಾ ರೋಲ್ ಕಿಯಾ ಹೈ ನಾ, ಮೈನೆ ಉನ್ಹೆ ಯಹಾಂ ದೇಖಾ' ಅಂತ ತುಂಬ excite ಆಗಿ ನಿಹಾ ನ ಫ್ರೆಂಡ್ ಅಮ್ಮ ಹೇಳಿದರು. ಅವರು ಮಾತು ಮುಗಿಸಿದ ಮೇಲೆ, ರಂಗ ಶಂಕರ ಅವರದ್ದೆ ಸಂಸ್ಥೆ ,ಅವರ ದಿವಗಂತ ಪತಿಯ ಹೆಸರಿನಲ್ಲಿ ಸಂಸ್ಥಾಪಿಸಿದ್ದು ರಂಗ ಶಂಕರ ಅಂತ ಹೇಳಿದೆ. ಅವರು ತೀರಾ ಇತ್ತೀಚಿಗೆ ಜೈಪುರ್ ದಿಂದ ಬೆಂಗಳೂರಿಗೆ ವರ್ಗವಾಗಿ ಬಂದಿದ್ದಾರೆ. 

 ಅದರಲ್ಲಿನ ಪಾತ್ರ ಮಾಡಿದ ಒಬ್ಬ ಹುಡುಗನ ಮಿಮಿಕ್ರಿ ಮಾಡಿ ನಿಹಾ ನ ನಗಿಸಿದೆ. ಪೆಡಿಕ್ಯೂರ್ ಮುಗಿಸಿ, ಕಿಶೋರಿ ತಾಯಿ ಯ ಇನ್ನೊಂದೆರಡು ಹಾಡು- ಅವಘಾ ರಂಗ್ ಎಕ್ ಝಾಲಾ', ಆಯಿ ರೆ ಬದರಿಯಾ ಕಾರಿ ಕಾರಿ, ಕೇಳುವಷ್ಟರಲ್ಲಿ , ಹಸಿವೆಯಿಂದ ಹೊಟ್ಟೆ ತಾಳ ಹಾಕಲಾರಂಭಿಸಿತು. ಸಮಯ ನೋಡಿದ್ರೆ 9.15. ಬಾಸುಂದಿ ರೆಡಿಯಾಗಿತ್ತು. ಅದಕ್ಕೆ ಸಕ್ಕರೆ ಬೆರೆಸಿ, ಸ್ತ್ಟವ್ ಆಫ್ ಮಾಡಿ, ಏಲಕ್ಕಿ ಕುಟ್ಟಿ, ದ್ರಾಕ್ಷಿ ಗೋಡಂಬಿ ಮೈಕ್ರೋವೇವಿಸಿ ಹಾಕಿ, ಫೋಟೊ ತೆಗೆದು, ಮಕ್ಕಳು ಊಟದ ನಂತರ ಅದನ್ನು ತಿನ್ನುವ ಹಾಗೆ ಫ್ರಿಜ್ ನಲ್ಲಿಟ್ಟೆ. ಅನ್ನದ ಪಾತ್ರೆ ಬಿಸಿ ಮಾಡಲು ತೆರೆದರೆ ಅದರಲ್ಲಿ ತುಂಬ ಕಡಿಮೆ ಅನ್ನ ಇತ್ತು. ಅನ್ನ ಮಾಡಿಕೊಳ್ಳುವಷ್ಟು ವ್ಯವಧಾನ ಇರಲಿಲ್ಲ.

ಆಗ ಆಪತ್ಬಾಂಧವ ಮ್ಯಾಗಿಯ ನೆನಪಾಯ್ತು. ಕೂಡಲೆ ಒಂದು ಚಿಕ್ಕ ನೀರುಳ್ಳಿ ಕಚಕಚನೆ ಚಕಚಕನೆ ಕಟ್ ಮಾಡಿದೆ, ಎರಡು ಬೆಳ್ಳುಳ್ಳಿ ಜಜ್ಜಿದೆ, ಫ್ರಿಜ್ ನಲ್ಲಿ ಫ್ರೋಜನ್ ಸ್ವೀಟ್ ಕಾರ್ನ್ ನೋಡಿದೆ. ಅದನ್ನು ಹೊರ ತೆಗೆದೆ. ಎಣ್ಣೆ ಬಿಸಿ ಮಾಡಿ ನೀರುಳ್ಳಿ - ಬೆಳ್ಳುಳ್ಳಿ ಹಾಕಿ ಕೈ ಆಡಿಸಿದೆ. ನಾಲ್ಕು ಹಸಿಮೆಣಸು ಹಾಕಿದೆ. ಅದಕ್ಕೆ ಒಂದು ಹಿಡಿ ಸ್ವೀಟ್ ಕಾರ್ನ್ ಬೆರೆಸಿ ಘಂ ಅನ್ನುವ ಪರಿಮಳ ಬರುತ್ತಿದ್ದ ಹಾಗೆ ನೀರು ಹಾಕಿದೆ. ಇಂಡಕ್ಷನ್ ಸ್ಟವ್ ಆದ್ದರಿಂದ ಅರ್ಧ ನಿಮಿಷಕ್ಕೆ ನೀರು ಕುದಿಯಲು ಶುರು. ಅದಕ್ಕೆ ಮ್ಯಾಗಿ ಮಸಲಾ ಪ್ಯಾಕ್ ನಿಂದ ಮಸಾಲೆ ಹಾಕಿದೆ. ಆಮೇಲೆ ನೂಡಲ್ಸ್ ಸೇರಿಸಿದೆ. ಫೋಟೊಗೋಸ್ಕರ ಕೊತ್ತಂಬರಿ ಸೊಪ್ಪಿನ ಶೋ off ಮಾಡಿದೆ. ತುಂಬಾ ಟೇಸ್ಟೀಯಾಗಿತ್ತು. ನನ್ನ ಬ್ಯಾಚಲರ್ ಬ್ಲಾಗ್ ಓದುಗ ತಮ್ಮಗೋಳ್ ಇದನ್ನು ಆರಾಮಾಗಿ ತಯಾರಿಸಿ ತಿನ್ನಬಹುದು.

ರಾಯರಂತು ಎರೆಡೆರಡು ಸಲ ಹಾಕಿಸಿಕೊಂಡು ತಿಂದ್ರು. ಎಷ್ಟು ಎಂಜಾಯ್ ಮಾಡಿದ್ವಿ ನಿನ್ನೆಯ ಡಿನ್ನರ್.

ರಾತ್ರಿ ನಿದ್ರೆ ಇಲ್ಲದೆ ಒಂದು ನ್ಯಾನೋ ಕತೆ ಹುಟ್ಟಿಕೊಂಡಿತು :

ಮಿತ್ರರಿಬ್ಬರು ಮಾತುಕತೆ ಆಡುತ್ತ ನಗುತ್ತ ಇದ್ದ ಹಾಗೆ ಬಾಗಿಲು ದಡದಡ ಸದ್ದು ಮಾಡಿತು. ಇವರ ರೂಂ ಗೆ ಆವಾಗಾವಾಗ ಮಿತ್ರರು ಭೇಟಿ ನೀಡುತ್ತಿದ್ದರಾದ್ದರಿಂದ ಆ ರಾತ್ರಿ ಅವರು ಯಾವತ್ತಿನ ಹಾಗೆ ಬಾಗಿಲು ತೆರೆದರು. ಬಂದೂಕು ಧಾರಿಯೊಬ್ಬ ಬಾಗಿಲು ತೆಗೆದವನನ್ನು ನೂಕಿ ಒಳಗೆ ಬಂದ

"ನಿನ್ನ ಹೆಸರೇನು?'

"ಪದ್ಮನಾಭ"

" ಸರಿ. ಆ ಕಡೆ ಸರಿ"

ಇನ್ನೊಬ್ಬ ರೂಂ ಮೇಟ್ ನನ್ನು ಉದ್ದೇಶಿಸಿ

'ನಿನ್ನ ಹೆಸರು'?

"ಸಾಹಿಲ್ ಖುರ್ಶೀದ್"

ಆಗ ಪದ್ಮನಾಭ "ಏನಲೇ ನೀನು ಮುಸ್ಲಿಮ್ ಆ? ಐದು ವರ್ಷ ಒಟ್ಟಿಗಿದ್ದರೂ ಇವತ್ತೆ ಗೊತ್ತಾಗಿದ್ದು ಅಂತ ಆಶ್ಚರ್ಯದಿಂದ ಕೇಳಿದ

ಬಂದೂಕುಧಾರಿ ಸಾಹಿಲ್ ನ ಎದೆಗೆ ಬಂದೂಕು ಗುರುಯಿಟ್ಟ. ಕೂಡಲೆ ಪದ್ಮನಾಭ ಸಾಹಿಲ್ ಗೆ ಎದುರಾಗಿ ನಿಂತು ನನ್ನ ಸ್ನೇಹಿತನನ್ನು ಕೊಲ್ಲುವ ಮೊದಲು ನಾನು ಸಾಯಬೇಕು

ಬಂದೂಕುಧಾರಿ ಗುಂಡಿ ಒತ್ತಿಯೇ ಬಿಟ್ಟ. ಒಂದೆ ಬುಲೆಟ್ ಇಬ್ಬರ ಹೃದಯ ಸೀಳಿ ಹಿಂದಿನ ಗೋಡೆಗೆ ಬಡಿಯಿತು. ಮಿತ್ರರಿಬ್ಬರೂ ಕುಸಿದರು. ಇಬ್ಬರ ರಕ್ತ ಕೂಡಿ ಕೋಡಿಯಾಗಿ ಹರಿಯಿತು, ಯಾವ್ ರಕ್ತ ಯಾರದ್ದು ಅನ್ನುವುದರ ಪರಿವೆಯೇ ಇಲ್ಲದೆ.

moral of the story is: ರಾತ್ರಿ ಮ್ಯಾಗಿಯಲ್ಲಿನ ಹಸಿಮೆಣಸು ತಿಂದು ಹೊಟ್ಟೆ ಉರಿದು ಇಂತಹ ಕತೆಗಳು ಹುಟ್ಟುವ ಸಂಭವವಿದೆ ಆದ್ದರಿಂದ ಹಸಿಮೆಣಸು ತಿನ್ನಬಾರದು.

ಅಷ್ಟೆ ಕಣ್ರೀssss........ನನ್ನ ಬ್ಲಾಗ್ ಗೊಂದು ಹೂರಣ ಕೂಡ ಸಿಕ್ಕಿತ್ತು
ನಿನ್ನೆಯ ದಿನಚರಿ

Maggi 20 minute noodles

ನಾನು ಮೊಟ್ಟ ಮೊದಲ ಬಾರಿಗೆ ಮ್ಯಾಗಿ ತಿಂದಿದ್ದು ಆರನೆ ತರಗತಿಯಲ್ಲಿದ್ದಾಗ. ಕೊನ್ವೆಂಟ್ ನಿಂದ ಫ್ರೀ ಎರಡು ಪ್ಯಾಕೆಟ್ ಕೊಟ್ಟಿದ್ದರು.ಅದನ್ನು ಹೇಗೆ ತಾಯಾರಿಸಬೇಕೆಂದು ಒಂದು ಪ್ರಾತ್ಯಕ್ಷಿ ಕೆ (Demo) ಕೂಡ ಮಾಡಿದರು. ಮನೆಗೆ ಬಂದ ಕೂಡಲೆ ನಾನಿ ಯನ್ನು ಪೀಡಿಸಿ ಬಿಸಿ ನೀರು ಮಾಡಿಸಿಕೊಂಡಿದ್ದೆ. ಮರಳುವ ನೀರಿನಲ್ಲಿ ಮ್ಯಾಗಿ ನೂಡಲ್ಸ್ ಹಾಕಿ , ಪ್ಯಾಕೆಟ್ ನಲ್ಲಿ ಕೊಟ್ಟ ಸೂಚನೆ ಪ್ರಕಾರ ಗಡಿಯಾರ ನೋಡಿಕೊಂಡು ಎರಡು ನಿಮಿಶ ಆದ ಮೇಲೆ ಅದನ್ನು ಕೆಳಗಿಳಿಸಿ, ಹರ ಸಾಹಸ ಮಾಡಿ ಬೆರಳಿನಿಂದಲೇ ತಿಂದಿದ್ದು. ಹಿಮ್ಮೇಳದಲ್ಲಿ ನಾನಿ ಹಾಗೂ ರಾಜೀವಿಯ ವರಾತ ಚಾಲೂ ಇತ್ತು, ಕ್ರಿಶ್ಚನ್ ಶಾಲೆಯಿಂದ ಕೊಟ್ಟಿದ್ದು, ಥೂ ಅದರಲ್ಲೇನಿರುತ್ತೋ ಹಾಳು-ಮೂಳು (ನನ್ನ ಅಜ್ಜನ ಮನೆಯಲ್ಲಿ ನಾವು vegetarian)  ಅಂತೆಲ್ಲ. ತಿಂದ ಸ್ವಲ್ಪ ಹೊತ್ತಿಗೆ ಗಳಗಳನೆ ವಾಂತಿ ಮಾಡಿ ಬಿಟ್ಟೆ. ಆಯ್ತು ನನ್ನ ಹಾಗೂ ಮ್ಯಾಗಿಯ ಉಸಾಬರಿ. ಆಮೇಲೆ ಎರಡು ಮೂರು ಸಲ ಶಾಲೆಯಲ್ಲಿ ಫ್ರೀ ಸ್ಯಾಂಪಲ್ ಪ್ಯಾಕೆಟ್ ಕೊಟ್ಟರೂ ನಾನದನ್ನು ತೆಗೆದುಕೊಳ್ಳುತ್ತಿರಲಿಲ್ಲ.

ನಾನಿಗೆ ಕ್ಯಾನ್ಸರ್ ಕಾಯಿಲೆ ಕಾಣಿಸಿಕೊಂಡ ಮೇಲೆ ನಾನು ಅಮ್ಮನ ಮನೆ ಅಂಧೇರಿಗೆ ಬಂದೆ. ಅಲ್ಲಿ ನನ್ನ ತಂಗಿ ಮ್ಯಾಗಿ ಮಾಡಿಕೊಂಡು ತಿನ್ನುತ್ತಿದ್ದಳು. ನಾನು ಒಂದು ದಿನ ಅವಳ ಜತೆ ತಿಂದೆ. ವಾಂತಿ ಗೀಂತಿ ಆಗಲಿಲ್ಲ. ಅಮೇಲೆ ಅದಕ್ಕೆ ತರಕಾರಿಗಳನ್ನೆಲ್ಲ ಹಾಕಿ ನನ್ನದೇ ಹಲವಾರು ವರ್ಷನ್ ನಲ್ಲಿ ವಾರಕ್ಕೊಂದು ಸರ್ತಿಯಾದ್ರು ಮ್ಯಾಗಿ ಮಾಡಿಕೊಂಡು ನಾವು ಮೂರು ಜನ ಮಕ್ಕಳು ತಿನ್ನುತ್ತಿದ್ದೆವು. ಒಬ್ಬ ತಮ್ಮನಿಗೆ ಅದು ಇಷ್ಟ ಆಗ್ತಿರಲಿಲ್ಲ. ಚೆನ್ನಾಗಿರುತ್ತಿತ್ತು ನಾನು ಮಾಡಿದ್ದು. ಅಪ್ಪ ಅಮ್ಮ ಮ್ಯಾಗಿ ಸುದ್ದಿಗೆ ಬರಲಿಲ್ಲ.

ಮದುವೆಯಾದ ಮೇಲೆ ಶ್ರೀಕಾಂತ ಬಳಿ ಯಾವುದೋ ಮಾತಿಗೆ ಮ್ಯಾಗಿ ಮಾತು ಎತ್ತಿದಾಗ ಛೀ, chiken feed..ಅದೇನು ತಿನ್ನೋದು ಅಂದಿದ್ದರಿಂದ ನಾನು ಕೊಪ್ಪದಲ್ಲಿ ನಮ್ಮದೇ ಬಾಡಿಗೆ ಮನೆಗೆ ಬಂದ ಮೇಲೆ ಅದನ್ನು ತಯಾರಿಸುತ್ತಿರಲಿಲ್ಲ. ಆದರೆ ತೀರ್ಥಹಳ್ಳಿಯಲ್ಲಿದ್ದಾಗ ಶ್ರೀಕಾಂತ ಅಕ್ಕನ ಮನೆಗೆ ಮಾವನವರ ಜತೆ ಪ್ರತೀ ಭಾನುವಾರ ಸಂಜೆ ಹೋಗುತ್ತಿದ್ದೆ. ಶ್ರೀಕಾಂತ ಅಕ್ಕನ ಮನೆಯಲ್ಲಿ ಟಿ.ವಿ ಯಿತ್ತು ಹಾಗಾಗಿ ಪ್ರತೀ ಭಾನುವಾರ ನನ್ನ ಹಾಗೂ ಮಾವನವರ ಸವಾರಿ ಅವರ ಮನೆಗೆ. ಮಾವನವರೋ ಉದ್ದಕ್ಕೆ, ನಾನು ಸಣಕಲು ಗಿಡ್ಡ ಪ್ರಾಣಿ. ನಾಚಿಕೊಂಡು ಕಣ್ಣು ಕೆಳಗಡೆ ರಸ್ತೆ ನೋಡ್ತಾ ,ರಾಜಠೀವಿಯಿಂದ ಸಾಗುತ್ತಿತ್ತು ನಮ್ಮ ಮೆರವಣಿಗೆ.ಮಾವನವರಿಗೆ ರಸ್ತೆ ಮಧ್ಯದಲ್ಲಿ ನಡೆಯುವ ಸ್ವಭಾವ. ದೊಡ್ಡ ವಾಹನಗಳೇನಾದರೂ ಬಂದರೆ ನಾನೇ ಎಷ್ಟೋ ಸಲ ಅವರನ್ನು ದರದರನೆ ಎಳೆದು ರಸ್ತೆ ಪಕ್ಕಕ್ಕೆ ತರುತ್ತಿದ್ದೆ. ಅನ್ನಕ್ಕನ ಮನೆ ತಲುಪಿದ ಮೇಲೆ ಮಾವ ಫಿಲ್ಮ್ ನೋಡುವುದರಲ್ಲಿ ಮಗ್ನರಾದರೆ, ನಾನು  ನನ್ನ ಪುಟ್ಟ ಸೊಸೆಯಂದಿರಿಗೆ ಮುಂಬಯಿನ ತಿನಿಸುಗಳನ್ನು ಮಾಡಿಕೊಡುತ್ತಿದ್ದೆ- ಪಾನಿಪೂರಿ, vegetable ಕೂರ್ಮ, ಐಸ್ ಕ್ರೀಮ್ (ಅವರ ಮನೆಯಲ್ಲಿ ಫ್ರೀಜ್ ಕೂಡ ಇತ್ತು),ರಾಜಮಾ ಮಸಾಲ,  ಮ್ಯಾಗಿ ಇತ್ಯಾದಿ. ಮ್ಯಾಗಿ ಮಾಡುತ್ತಿದ್ದುದ್ದೆ ಹೆಚ್ಚು, ’ಮಾಲತೆಕ್ಕ ನೀನು ಮಾಡಿದ ಮ್ಯಾಗಿ ಚೆನ್ನಾಗಿರುತ್ತೆ, ಅಪ್ಪನೂ ತಿನ್ನುತ್ತಾರೆ’ ಅಂತ ಮಾಡಿಸಿಕೊಳ್ಳುತ್ತಿದ್ದರು.

ಉಳಿದಂತೆ ನಾನು ನನ್ನ ಪದವಿ ಪರೀಕ್ಷೆಗೆ ಮುಂಬಯಿಗೆ ಹೋದಾಗಲೆಲ್ಲ, ಮ್ಯಾಗಿ ಮಾಡುವ ಕೆಲಸ ನನ್ನದೆ. ಮಹಾ ಸಂಭ್ರಮ ಆ ದಿನ. ಸ್ಟೈಲ್ ಆಗಿ ನೀರುಳ್ಳಿ ಕಟ್ ಮಾಡಿ, ಫ್ರೀsssಜ್ ಮಾಡಿದ ಬಟಾಣಿ ನೀರಿಗೆ ಹಾಕಿ, ಒಂದು ಕಡೆ ಗ್ಯಾಸ್ ನಲ್ಲಿ ನೀರು ಬಿಸಿ ಮಾಡಲು ಇಟ್ಟು, ಕ್ಯಾರಟ್, ಬೀನ್ಸ್, ದೊಣ್ ಮೆಣಸಿನಕಾಯಿ,ಕ್ಯಾಬೇಜ್, ಟೋಮ್ಯಾಟೋ ಸಪೂರಕ್ಕೆ ಕಟ್ ಮಾಡಿ ಇಡುತ್ತಿದೆ.ಅರ್ಧ ಟೀ ಸ್ಪೂನ್ ಬೆಣ್ಣೆಯಲ್ಲಿ ನೀರುಳ್ಳಿ ಕೆಂಪಗೆ ಹುರಿದು, ಉಳಿದ ತರಕಾರಿ ಹಾಕಿ, ಚಿಟಿಕೆ ಸಕ್ಕರೆ, ಗರಂ ಮಸಾಲೆ ಪುಡಿ ಬೆರೆಸಿ, ಆ ಮೇಲೆ tomato ಹಾಕಿ ಹುರಿದು, ಕುದಿಯುವ ನೀರು ಹಾಕುತ್ತಿದೆ. ಮ್ಯಾಗಿ ಪ್ಯಾಕ್ ನಲ್ಲಿರುವ ಮಸಾಲಾ ಪೌಡರ್ ಹಾಕಿ ಎರಡು ನಿಮಿಶ ಕೈ ಯಾಡಿಸಿ, ನೂಡಲ್ಸ್ ಸೇರಿಸುತ್ತಿದೆ. ಎರಡು ನಿಮಿಶ ಮುಚ್ಚಿಟ್ಟು, ಬಿಸಿ ಬಿಸಿ ಮ್ಯಾಗಿಯ ಬಾಣಲೆ ಟೇಬಲ್ ಮೇಲಿಟ್ಟು ನಾವು ಅದರ ಸುತ್ತಲೂ ಪವಡಿಸಿ, ಮ್ಯಾಗಿ ತಿನ್ನಲೆಂದೇ ಖರೀದಿಸಿದ ಮುಳ್ಳು ಚಮಚೆ ಉಪಯೋಗಿಸಿ..ತುಂಬ ಎಂಜಾಯ್ ಮಾಡುತ್ತಿದ್ದೆವು ಮಾಲತಿಯ 20 ಮಿನಿಟ್ಸ್ ಮ್ಯಾಗಿ ನೂಡಲ್ಸ್

ಉಜಿರೆಯಲ್ಲಿದ್ದಾಗ- ಬಹುಶ: ಮಾಲವಿಕ ಮೊದಲನೇ ಕ್ಲಾಸ್ ನಲ್ಲಿ ಓದುವಾಗ ಮ್ಯಾಗಿ ಮಾಡಲು ಶುರು ಮಾಡಿದ್ದೆ. ಸಂಜೆ ಹಸಿದುಕೊಂಡು ಬಂದಾಗ ಒಂದು ಸಲ ಮ್ಯಾಗಿ ಮಾಡಿದ್ದೆ. ಅವಳಿಗದು ಇಷ್ಟವಾಗಿದ್ದರಿಂದ ನಾನು ಆಗಾಗ್ಗ ಮ್ಯಾಗಿ ಮಾಡಲು ಶುರು ಮಾಡಿದೆ. ಶ್ರೀಕಾಂತ ಮೊದ ಮೊದಲು ಮೂಗು ಸಿಂಡರಿಸುತ್ತಿದ್ದರು- chicken feed ಜತೆ junk food ಪದದ ಪ್ರಯೋಗ ಕೂಡ ಮಾಡುತ್ತಿದ್ದರು. ಆದರೆ ನಾನು ಹಾಕಿರುವ ತರಕಾರಿಗಳ ಬಗ್ಗೆ ವಿವರಣೆ ಕೊಡುತ್ತಿದ್ದೆ. ನಾವು ಮ್ಯಾಗಿ ತಿನ್ನುವಾಗ ತುಂಬ sound effects ಮಾಡುತ್ತಿದ್ದೆವು..ಮ್ಮ್ಮ್ಮ್ಮ್ಮ್ ಸೂಪರ್, ಟೇಸ್ಟಿ , ಹೆವನ್ಲೀ (heavenly)...ಅಂತೆಲ್ಲ ಕಣ್ಣು ಮುಚ್ಚಿ ತುಂಬ ಆಕ್ಟಿಂಗ್ ಮಾಡುತ್ತಿದ್ದೆವು. ಶ್ರೀಕಾಂತ ಗೆ ಕರೀತಿರಲಿಲ್ಲ. ಒಂದು ದಿನ ನಾನೂ ಮಕ್ಕಳು ಮ್ಯಾಗಿ ತಿನ್ನುವಾಗ ಅವರು ಒಂದು ಪ್ಲೇಟ್ ಹಿಡಿದುಕೊಂಡು,ಒಳ್ಳೆ ಪರಿಮಳ ಬರ್ತಾ ಇದೆ ಅಂತ ಹೇಳಿ  ಸುಮ್ಮನೆ ನಮ್ಮ ಜತೆ ಕೂತು ಮ್ಯಾಗಿ ತಿಂದ್ರು....:-) ಅದಾದ ನಂತರ ನಾವು ಟೂರ್ ಟ್ರಿಪ್ ಅಂತೆಲ್ಲ ಹೋಗಿ ಬಂದ ನಂತರ ರಾತ್ರಿ ಅದೇ ನಮ್ಮ ಊಟ ಆಗಿರುತ್ತಿತ್ತು. ಅಷ್ಟೆ ಅಲ್ಲ ನಮಗೆ ಯಲ್ಲಿಗಾರ ಮತ್ತು ಅವರ ಕುಟುಂಬದ ಪರಿಚಯ ಆಗಿ ಪ್ರತೀ ವಾರ್ಯಾಂತದಲ್ಲಿ ಬೈಕ್ ಮೇಲೆ ಎಲ್ಲಾದರೂ ಹೋಗಿ, ರಾತ್ರಿ ನಾನು ’ಮ್ಯಾಗಿ ಮಾಡ್ತೇನೆ ತಿಂದು ಹೋಗಿ’ ಅಂತ ಅವರಿಗೂ ಮ್ಯಾಗಿಯ ಫ್ಯಾನ್ ಮಾಡಿ ಬಿಟ್ಟೆ. ತರಹಾವರಿ ಬಗೆಯ ಮ್ಯಾಗಿ ಮಾಡುತ್ತಿದ್ದೆನಾದ್ದರಿಂದ ಅದೂ ಯಾವತ್ತೂ ಬೋರ್ ಹೊಡಿಸಲಿಲ್ಲ.

ಈಗ ತಂಗಿ ಯು ಎಸ್ ನಲ್ಲಿರೋದು, ಅವಳು ಇಲ್ಲಿ ಬಂದಾಗಲೆಲ್ಲ ಒಂದು ದಿನ ನಾನು ಮಾಡುವ ಮ್ಯಾಗಿಯ ಸಂಭ್ರಮ,ಅವಳ ಪುಟಾಣಿ ಮಕ್ಕಳಿಗೆ ನಾನು ಮಾಡಿದ ಮ್ಯಾಗಿ ಇಷ್ಟ ಅಂತೆ. ಉಳಿದ ದಿನ ಮಾಲವಿಕ, ನಿಹಾರಿಕ ಅವಳ ಮಕ್ಕಳಿಗೆ ಮಾಡಿಕೊಡುತ್ತಾರೆ, ಆದರೆ ನಾನು ಮಾಡುವ ಮ್ಯಾಗಿ special ಅದರಲ್ಲಿ ದೊಡ್ಡ ಟೇಬಲ್ ಚಮಚ ಪ್ರೀತಿ ಕೂಡ ತುಂಬಿರುತ್ತೆ.

ಮಾಲವಿಕ ಅಂತೂ ಒಂದು ಹೆಜ್ಜೆ ಮುಂದೆ, ಮೈಕ್ರೋವೇವ್ ನಲ್ಲಿ ಎರಡೆ ನಿಮಿಷದಲ್ಲಿ ಮ್ಯಾಗಿ ಮಾಡಿಕೊಂಡು ತಿನ್ನುತ್ತಾಳೆ. ಆಕಸ್ಮಾತ ಬೆಳಿಗ್ಗೆ ಅವಳಿಗೆ ಲೇಟ್ ಆದ್ರೆ, ಮನೆಯಿಂದ ಒಂದು ಪ್ಯಾಕೆಟ್ ಮ್ಯಾಗಿ ಎತ್ತುಕೊಂಡು (ಮ್ಯಾಗಿಯ ಸ್ಟಾಕ್ (stock)  ಯಾವತ್ತೂ ಇರತ್ತೆ ಮನೆಯಲ್ಲಿ) ಹೋಗಿ ಅವಳು ಕೆಲಸ ಮಾಡುವಲ್ಲಿ ಮೈಕ್ರೋ ವೇವ್ ಇದೆ ಯಾದ್ದರಿಂದ ಅಲ್ಲೇ ಮಾಡಿಕೊಂಡು, ಅವಳ ಸಹೋದ್ಯೋಗಿಗಳ ಜತೆ ಶೇರ್ ಮಾಡಿಕೊಂಡು ತಿನ್ನುತ್ತಾಳೆ.

ಧನ್ಯವಾದಗಳು ಮ್ಯಾಗಿ.

ನನ್ನ ಆತ್ಮೀಯ ಮಿತ್ರರೊಬ್ಬರು ಒಂದು ಸಲ ಫೋನ್ ಮಾಡಿದಾಗ ನಾವು ಮ್ಯಾಗಿ ತಿನ್ನುತ್ತಿದ್ದೆವು. ಅವರು "ಏನು ಮಾಡ್ತಾ ಇದ್ದೀರಾ’ ಅಂತ ಕೇಳಿದಾಗ , ನಾನು ’ ಜಂಕ್ ಫುಡ್ ಕಬಳಿಸ್ತಾ ಇದ್ದೇವೆ’ ಅಂದಿದ್ದೆ..ಆಗ ಅವರು ’ಜಿಂಕೆ ಮರೀನಾ’ ಹಾಡನ್ನ್ನು ನಮಗೋಸ್ಕರ ’ಜಂಕಿ ಮರೀನಾ’ ಅಂತ ಬದಲಾಯಿಸಿ ಹಾಡಿದ್ದರು)

:-)
Picture of Maggie packet from the net.