ನಾನಿ ಹೇಳಿದ ಕತೆ

ಒಂದು ಊರಿತ್ತಂತೆ. ಆ ಊರಿನಲ್ಲಿ ರಾತ್ರಿ ದೇವರ ದೀಪಗಳೆಲ್ಲವೂ ಆರಿ ಊರಿನ ಮಧ್ಯದಲ್ಲಿರುವ ಅಶ್ವತ್ಥ ಕಟ್ಟೆಯ ಮೇಲೆ ಸೇರುತ್ತಿದ್ದವಂತೆ.

ಹೆಂಚಿನ ಮನೆಯ ದೀಪಕ್ಕೆ, ದೊಡ್ಡ ಮನೆಯ ದೀಪ ಕೇಳಿತಂತೆ 'ಏನಾಯ್ತು ನಿಮ್ಮ ಮನೆ ಕತೆ'? ಅಂತ

ಅದಕ್ಕೆ ಹೆಂಚಿನ ಮನೆಯ ದೀಪ, ಸೊಸೆಯನ್ನು ಮನೆಯಿಂದ ಹೊರಹಾಕಿಬಿಟ್ರು'

ಹೊಸದಾಗಿ ಗೃಹಪವೇಶ ಆದ ಮನೆಯ ದೀಪ, ಅದೇನದು ನನಗೂ ಆ ಕತೆ ಹೇಳಿ ಅಂತ ಕೇಳಿಕೊಂಡಿತು

ಹೆಂಚಿನ ಮನೆಯ ದೀಪ:

ನನ್ನ ಮನೆಯಲ್ಲಿ ಇರೋದು ಪುಟ್ಟ ಸಂಸಾರ, ಅಮ್ಮ ಮಗ ಮತ್ತು ಸೊಸೆ. ಅತ್ತೆಗೆ ಒಂದು ಅಭ್ಯಾಸ ಚಕ್ಕುಲಿ, ಕೋಡುಬಳೆ, ಲಾಡು ಎಲ್ಲ ಮಾಡಿದ್ರೆ ಅದನ್ನು ಲೆಕ್ಕ ಮಾಡಿಡೋದು. ಅವರಿಗೆ ಸೊಸೆ ಮೇಲೆ ಗುಮಾನಿ, ಮಾಡಿದ ತಿಂಡಿನೆಲ್ಲ ಅವಳೇ ತಿಂದು ಬಿಡುತ್ತಾಳೇನೋ ಅಂತ. ಹಿಂದಿನ ವಾರ ಅತ್ತೆ ಕೋಡುಬಳೆ ಮಾಡಿ ಲೆಕ್ಕ ಮಾಡಿ ಆರಲಿಕ್ಕೆ ಅಂತ ತಟ್ಟೇಯಲ್ಲಿ ಹಾಕಿ ಇಟ್ಟಿದ್ದಳು. ಅದರ ಘಂ ಎನ್ನುವ ಪರಿಮಳಕ್ಕೆ ತಡಿಯಲಾರದೆ ಸೊಸೆ ಅದರಲ್ಲಿನ ನಾಲ್ಕು ಕೋಡುಬಳೆ ಗುಳುಂ ಮಾಡಿದಳು. ಹೊರಗಿನ ಕೆಲಸಗಳನ್ನೆಲ ಮುಗಿಸಿ ಒಳ ಬಂದ ಅತ್ತೆಯ ಸೂಕ್ಷ್ಮ ಕಣ್ಣುಗಳಿಗೆ ತಟ್ಟೆಯಲ್ಲಿ ಕೋಡುಬಳೆ ಕಡಿಮೆ ಅಂದೆನಿಸಿ ಪುನಃ ಅದನ್ನು ಲೆಕ್ಕ ಮಾಡಿ ಸೊಸೆಯನ್ನು ತರಾಟೆಗೆ ತೆಗೆದುಕೊಂಡಳು. "ಏನಿದು? ನಾಲ್ಕು ಕೋಡುಬಳೆ ಕಡಿಮೆಯಿದೆ'. ಹೆದರಿದ ಸೊಸೆ, ಗೊತ್ತಿಲ್ಲ ಅತ್ತೆ ಒಂದು ಇಲಿ ಇಲ್ಲೇ ಓಡಾಡುತ್ತ ಇತ್ತು ಬಹುಶ: ಅದು ತಿಂದಿರಬೇಕು ಅಂದಳು. ಇರಬಹುದೇನೋ ಅಂತ ಅತ್ತೆ ಸುಮ್ಮನಾದರೂ, ಅಲ್ಲೇ ಇವರ ಸಂಭಾಷಣೆಯನ್ನು ಕೇಳಿತ್ತಿದ್ದ ಇಲಿಗೆ ಎಲ್ಲಿಲ್ಲದ ಸಿಟ್ಟು ಬಂತು. ನನ್ನ ಮೇಲೆ ಸುಳ್ಳು ಅಪಾದನೆ ಹಾಕಿದ್ದ ಸೊಸೆಗೆ ಬುದ್ದಿ ಕಲಿಸುವ ಹುನ್ನಾರ ಹಾಕತೊಡಗಿತು.

ದೀಪ ಮುಂದುವರೆಸಿತು:- ನಮ್ಮ ಮನೆಯಿರುವುದು ರಸ್ತೆಯ ಪಕ್ಕದಲ್ಲಿ ಆದುದರಿಂದ ಪಂಢರಪುರಕ್ಕೆ ಹೋಗುವ ಯಾತ್ರಾರ್ಥಿಗಳು ರಾತ್ರಿ ಇವರ ಜಗಲಿ ಮೇಲೆ ತಂಗುತ್ತಿದ್ದು, ಬೆಳಿಗ್ಗೆ ಎದ್ದು ಹೋಗುತ್ತಾರೆ. ನಿನ್ನೆ ಹೀಗೆ ರಾತ್ರಿ ಒಬ್ಬ ಗಂಡಸು ಜಗಲಿ ಮೇಲೆ ತಂಗಿದ್ದ. ಇಲಿ ಸೊಸೆಯು ರಾತ್ರಿ ಮಲಗುವ ಮುನ್ನ ಕಳಚಿಟ್ಟ ಚವರಿ /ಚೌರಿ ಯನ್ನು ಆ ದಾರಿಹೋಕನ ಬಳಿ ಒಯ್ದಿಟ್ಟಿತು. ಬೆಳಿಗ್ಗೆ ಅಂಗಳ ಗುಡಿಸಲು ಹೊರ ಬಂದ ಅತ್ತೆಗೆ ಸೊಸೆಯ ಚೌರಿ ಹೊರಗೆ ಜಗಲಿ ಮೇಲೆ ದಾರಿಹೋಕನ ಬಳಿಯಲ್ಲಿ ಇದ್ದದ್ದು ನೋಡಿ ಗಲಾಟೆ ಮಾಡಿ ಸೊಸೆಯನ್ನು ಮನೆಯಿಂದ ಹೊರದಬ್ಬಿದಳು....ಇಷ್ಟೆ ಕತೆ

pic from the net

ಈ ಕತೆ ನಾನಿ ನನಗೆ ಹೇಳಿದಾಗ 9 ವರ್ಷ ವಯಸ್ಸು. ಚೌರಿ ಹೊರಗೆ ಇರುವುದಕ್ಕೂ ಸೊಸೆಯನ್ನು ಹೊರಗೆ ದಬ್ಬುವುದಕ್ಕೂ ಏನೂ ಕಾರಣ ಅಂತ ಗೊತ್ತಾಗದೆ ತುಂಬ ಪೇಚಾಟಕ್ಕೆ ಒಳಗಾಗಿದ್ದೆ. ನಾನಿ ಗೆ ಕೇಳಲೂ ಭಯ. ಯಾಕೆಂದರೆ ನಾನಿ ಎರಡು ವರ್ಷಕ್ಕೊಮ್ಮೆ ನಾನು ಕಾಡಿಸಿ ಪೀಡಿಸಿ ಗೋಗರೆದ ಮೇಲೆ ಕತೆ ಹೇಳುತ್ತಿದ್ದುದು. ನಾನಿಗೆ ಸಿಟ್ಟು ಬರೆಸಲು ಅಥವ ನನಗೆ ಏನೂ ಗೊತ್ತಿಲ್ಲ ಎನ್ನುವ ಭಾವನೆ ಬರಿಸಲು ನಾನು ಸಿದ್ದಳಿರಲಿಲ್ಲ. ಎಷ್ಟೋ ವರ್ಷಗಳ ನಂತರ ಈ ಕತೆಯ ಮರ್ಮ ಗೊತ್ತಾಗಿ ಜೋರಾಗಿ ನಕ್ಕು ಬಿಟ್ಟಿದ್ದೆ. (ಸೋಮವಾರ ಕೇಳಿದ ಜೋಕ್ ಗೆ ಯಾರೋ ಬುಧವಾರ ನಕ್ಕ ಹಾಗೆ)..

ನಾನಿ = ಅಜ್ಜಿ (ಅಮ್ಮನ ಅಮ್ಮ)

ಚೌರಿ (ಕೊಂಕಣಿ ಪದ) ಜಡೆಗೆ ಹಾಕುವ ಕೂದಲಿನ ಕುಚ್ಚು. ಮೋಟು ಜಡೆಯಿದ್ದವರಿಗೆ ಇದರಿಂದ ತುರುಬು ಕಟ್ಟಲು ಸುಲಭ)

:-)