ಒಂದು ಹಳೆ ಪತ್ರ (ಸಂಚಿಯಿಂದ ತೆಗೆದ ನೆನಪು)

ಮೊದಲಿಗೆ ಈ ಎರಡು ಲಿಂಕ್ ನಲ್ಲೇನಿದೆ ಓದಿ

ಮಾಂಗಲ್ಯಂ ತಂತುನಾನೇನಾ ಭಾಗ- 1

ಮಾಂಗಲ್ಯಂ ತಂತುನಾನೇನಾ ಭಾಗ - 2

ಆತ್ಮೀಯ ಶ್ರೀವತ್ಸ ಜೋಶಿಯವರಿಗೆ,

ವಂದನೆಗಳು. ಕರಿಮಣಿ/ಮಾಂಗಲ್ಯ ಕುರಿತ ಲೇಖನ ಚೆನ್ನಾಗಿ ಮೂಡಿ ಬಂದಿದಿಎ. ಲಿಂಕ್ ಕಳುಹಿಸಿದಕ್ಕಾಗಿ ಧನ್ಯವಾದಗಳು. ಎಷ್ಟೆಲ್ಲಾ ಮಾಹಿತಿಗಳನ್ನು ಕಲೆತುಹಾಕಿ ಈ ಲೇಖನವನ್ನು ವಿಚಿತ್ರಾನ್ನದಲ್ಲಿ ನಮಗೆ ಉಣಬಡಿಸಿದ್ದೀರಾ. ಲೇಖನದಲ್ಲಿ ಕೊಟ್ಟಿರುವ ಮಾಹಿತಿಯಲ್ಲಿ 75% ವಿಚಾರಗಳು ಗೊತ್ತಿರಲಿಲ್ಲ ಎಂದು ಹೇಳುವುದಕ್ಕೆ ಮುಜುಗರವಾಗುತ್ತೆ. ಮದುವೆಯಾಗಿ (ಇನ್ನು ಕೆಲವೇ ತಿಂಗಳಲ್ಲಿ) 21 ವರ್ಷ ವಾಗುತ್ತೆ. ಮಾಂಗಲ್ಯ ಅಂದರೆ ಮದುವೆಯಾಗಿರುವ ಬಗ್ಗೆ trademark ಚಿನ್ಹೆ ಅಂತಷ್ಟೆ ಅಂದುಕೊಂಡಿದ್ದೆ.

ಹಾಗೆಯೇ ನಮಗೆ ಗೊತ್ತಿರುವ ಮಾಹಿತಿಗಳೇನಾದರು ಇದ್ದರೆ ಇ-ಮೇಲ್ ಮೂಲಕ ಕಳುಹಿಸಲು ಹೇಳಿದ್ದಿರಾ.

ನಾವು ಕೊಂಕಣಿ G.S.B. ನಮ್ಮಲ್ಲಿ ಮದುವೆ ಸಮಯದಲ್ಲಿ ತವರಿನಿಂದ ಕರಿಮಣಿ ಸರ ಧಾರೆ ಎರೆಯುವ ಸಮಯದಲ್ಲಿ ತೊಡಿಸುತ್ತಾರೆ. ಆದರೆ ಅದು ಮಾಂಗಲ್ಯ ಅಲ್ಲ, ಆ ಕರಿಮಣಿ ಸರವನ್ನು 'ಧಾರೆಮಣಿ' ಅನ್ನುತ್ತಾರೆ. ಮತ್ತೆ ಮಾಂಗಲ್ಯವನ್ನು ಹವಳ ಹಾಗೂ ಎರಡೇ ಕರಿಮಣಿಯೊಂದಿಗೆ ಪೋಣಿಸುತ್ತಾರೆ. ಸರದ ಮಧ್ಯದಲ್ಲಿ ಚೌಕಾಕಾರದ ತಾಳಿ, ಅದರ ಎರಡೂ ಬದಿಗೆ ಆರರಂತೆ, 12 ಹವಳ ಹಾಕಿರುತ್ತಾರೆ. ಕೊನೆಯಲ್ಲಿ ಎರಡೂ ಬದಿಗೆ ಒಂದೊಂದು ಕರಿಮಣಿ. ಆದರೆ ಒಂದು ವೈಚಿತ್ರ್ಯವೆಂದರೆ ಮದುವೆಯಾದ ಕೆಲವೇ ದಿನಗಳಲ್ಲಿ ಮಾಂಗಲ್ಯವನ್ನು locker ನಲ್ಲಿಟ್ಟು, ಕರಿಮಣಿಯನ್ನು ಸದಾ ಕೊರಳಿನಲ್ಲಿ ಹಾಕಿರುತ್ತಾರೆ. ಇದರೆ ಬಗ್ಗೆ ಎಷ್ಟು ತಲೆ ಕೆರೆದುಕೊಂಡರೂ ಸುಳುಹು ಸಿಗಲಿಲ್ಲ. ಅದಕ್ಕೆ ಪತಿಯ ಊರಾದ ತೀರ್ಥಹಳ್ಳಿಗೆ ಫೋನಾಯಿಸಿದೆ. ನನ್ನ ಅಕ್ಕ (co-sister) ವೈದೀಕ ಪರಿವಾರದ ಹಿನ್ನೆಲೆಯವರು. ಆಶ್ಚರ್ಯ ಅಂದರೆ ಅವರಿಗೂ ಗೊತ್ತಿರಲಿಲ್ಲ. ಅಮ್ಮನಿಗೆ ಫೋನ್ ಮಾಡಿದೆ. ಅಮ್ಮ ಹೇಳಿದ್ರು ಯಾರಿಗ್ಗೊತ್ತು ಅಂತ. ಅದಕ್ಕೆ ನಾನು ಕೇಳಿದೆ, 'ಗೊತ್ತಿಲ್ಲದೇ ಹಾಗೆ ಮದುವೆ ಮಾಡ್ಕೊಂಡ್ರಾ ಅಂತ? ಅದಕ್ಕೆ ಅಮ್ಮನ ಪ್ರತ್ಯುತ್ತರ, 'ನಾವು ಹಿರಿಯರಿಗೆ ಅದನ್ನೆಲ್ಲಾ ಕೇಳ್ತಿರಲಿಲ್ಲ.. (ಬಹುಶ: ನೀನು ತಲೆಹರಟೆ ಪ್ರಶ್ನೆಗಳನ್ನೆಲ್ಲ ಕೇಳಬೇಡ ಅಂತ ಇನ್ ಡೈರೆಕ್ಟ್ ಆಗಿ ಹೇಳಿರಬೇಕು.)

ಆಮೇಲೆ ಗೊತ್ತಿರುವ ಸಂಬಂಧಿಕರಿಗೆಲ್ಲ ಫೋನಾಯಿಸಿದೆ. ರಿಸಲ್ಟ್ ಮಾತ್ರ ನಿಲ್. ಸೋ, ದೇರ್ಫೋರ್ ಗೊತ್ತಿದವ್ರು ಪ್ಲೀಸ್ ಇದರ ಮೇಲೆ ಬೆಳಕು ಚೆಲ್ಲಿ......

ನಿಜ ಹೇಳಬೇಕು ಅಂದ್ರೆ ನನಗೂ ತಾಳಿ ಒಂದು ಆಭರಣ ಅಷ್ಟೆ. ಮದುವೆ, ಮುಂಜಿ ಹಾಗೂ ದೇವಸ್ಥಾನಕ್ಕೆ ಹೋಗುವಾಗ ಹಾಕಿಕೊಳ್ತೇನೆ.

ತಾಳಿ ನನಗೆ ಒಂದು ಹಳೆಯ ಪ್ರಸಂಗ ನೆನಪಿಸಿತು. ನನ್ನ ಹಿರಿಯ ಮಗಳು ಹುಟ್ಟಿದ ಸಮಯ. ಹಾಲುಡಿಸಲಿಕ್ಕೆ ತೊಂದರೆ ಆಗುತ್ತೆ ಅಂತ ತಾಳಿ ತೆಗೆದು ಇಟ್ಟಿದ್ದೆ. ನನ್ನ ವಯಸ್ಸಾದ ಅಜ್ಜಿ ನನ್ನ ಬಾಣಂತನಕ್ಕೆ ಹೆಲ್ಪ್ ಅಗ್ತದೆ ಅಂತ ನಮ್ಮಲ್ಲಿ ಬಂದಿದ್ರು. ನನ್ನ ಬೋಳು ಹಣೆ ಕಿವಿ ಕುತ್ತಿಗೆ ನೋಡಿ, 'ಎಂತದ್ದೆ ಇದು ಮಾರಾಯ್ತಿ ಅಂತ ಗಟ್ಟಿ 'ತಾಳಿ'ಗೆ ಮಾಡಿ ಕೇಳಿದ್ರು. ಗಟ್ಟಿ ತಾಳಿಗೆ ಯಾಕಂದ್ರೆ ಅವರಿಗೆ ಕಿವಿ ಸ್ವಲ್ಪ ಮಂದ. ಅದಕ್ಕೆ ಬೇರೆಯವರಿಗೂ ಕಿವಿ ಕೇಳಿಸುವುದಿಲ್ಲ ಎಂದು ಅವರ ಗುಮಾನಿ.

ಅದಕ್ಕೆ ನಾನು 'ಅಜ್ಜಿ, ಏನಾಯ್ತೀಗ' ಅಂದೆ. ಅಜ್ಜಿ : ಅದು ಸುಮಂಗಲೀಯರ ಲಕ್ಷಣ. ಹಾಗೆಲ್ಲ ತಾಳಿ ಕುಂಕುಮ ತೆಗೆದು ಓಡಾಡಬಾರದು. ಗಂಡನ ಆಯಸ್ಸು ಕಡಿಮೆಯಾಗುತ್ತೆ ಅಂತೆಲ್ಲ ಅಂದ್ರು. ನೀನು ಒಂದೂ ದಿನ ತೆಗಿಲಿಲ್ಲವ ಅಜ್ಜಿ ಅಂತ ಕೇಳಿದೆ. ಇಲ್ಲಪ್ಪ ಬಾಣಂತನಕ್ಕೆ ಎಣ್ಣೆ ಹಚ್ಚಿ ಸ್ನಾನ ಮಾಡುವಾಗಲೂ ತೆಗಿಲಿಲ್ಲ ಅಂದ್ರು. ನಮ್ಮ ಅಜ್ಜಿ ತುಂಬ ಶ್ರೀಮಂತ ಪರಿವಾರದಿಂದ ಬಂದವರು. ಅವರ ಕಿವಿಯಲ್ಲಿ ದೊಡ್ಡ ದೊಡ್ಡ ಹರಳಿನ ವಜ್ರದ ಬೆಂಡೋಲೆಗಳಿದ್ದವು ಅದರಿಂದ ಅವರ ಮುಖದ ಲಕ್ಷಣ ಇನ್ನಷ್ಟು ಬೆಳಗುತ್ತಿತ್ತು. ಅದಕ್ಕೆ ನಾನು 'ಹಾಗಾದ್ರೆ ಅಜ್ಜ ಯಾಕೆ ತೀರಿಕೊಂಡರು ಅಂತ ಕೇಳಿದೆ. ನಮ್ಮ ಅಜ್ಜ ನಾವೆಲ್ಲ ಹುಟ್ಟುವ ಮುಂಚೆಯೆ ತೀರಿ ಕೊಂಡಿದ್ರು). ಅಜ್ಜಿ ಸುಮ್ಮನಾಗಿಬಿಟ್ಟರು. ಪಾಪ ಅಜ್ಜಿಗೆ ನನ್ನ ತಲೆಹರಟೆ ಪ್ರಶ್ನೆಯಿಂದ ಎಷ್ಟು ನೋವಾಗಿರಬೇಕು? ಅದು ಅವರ ಸೆಂಟಿಮೆಂಟು, ನಾನು ಸುಮ್ಮನೆ ಅವರು ಹೇಳಿದ್ದನ್ನೆಲ್ಲ ಕೇಳಬಹುದುತ್ತು. ಯಾಕೋ ನೀವು ಬರೆದ 'ತಾಳಿ' ಬಗ್ಗೆ ಲೇಖನ ಓದಿ ಈ ಮೇಲಿನ ಪ್ರಸಂಗ ನೆನಪಾಗಿ ಕಣ್ಣು ಹನಿಗೂಡಿತು.

*ತಾಳಿಗೆ = ಗಂಟಲು

ಮಾಲತಿ ಎಸ್.

ಬೆಂಗಳೂರು

ಯಾವುದೋ ಫೈಲ್ ಹುಡುಕುತ್ತಿದ್ದಾಗ ಸಿಕ್ಕಿದ್ದು. 5 ವರ್ಷಗಳ ಹಿಂದಿನ ನನ್ನ ಕನ್ನಡ ಚೆನ್ನಾಗಿತ್ತು ಅಂತ ನನ್ನ ಅನಿಸಿಕೆ. ನೀವೇನು ಹೇಳುತ್ತೀರಿ?

ಆವಾಗೆಲ್ಲ ಶ್ರೀವತ್ಸ ಜೋಶಿಯವರ ಪ್ರತೀ ವಿಚಿತ್ರಾನ್ನದ ಎಪಿಸೋಡ್ ಓದೋದು ದೊಡ್ಡ ದೊಡ್ಡ ರಿಪ್ಲೈ ಹಾಕೋದು ಇದೇ ಕೆಲಸ ಆಗೋಗಿತ್ತು. ನನ್ನ ಕನ್ನಡ ಸಾಕಷ್ಟು ಸುಧಾರಿಸಲು ಸಹಕಾರಿಯಾದ ಶ್ರೀವತ್ಸ ಜೋಶಿ ಹಾಗೂ ದ್ಯಾಟ್ಸ್ ಕನ್ನಡ ಡಾಟ್ ಕಾಮ್ (ಶ್ಯಾಂ ಸುಂದರ್) ಇಬ್ಬರಿಗೂ ಧನ್ಯವಾದಗಳು ಹೇಳಲೇಬೇಕು....


ಶ್ರೀವತ್ಸ ಜೋಶಿಯವರು ತಮ್ಮ ಬ್ಯುಸಿ ಶೆಡ್ಯೂಲ್ ನಲೂ ಈ ಹಳೆಯ ಲಿಂಕ ಕಳಿಸಿಕೊಟ್ಟಿದ್ದಾರೆ. ಅವರಿಗೆ ಇನ್ನೊಂದು ಥ್ಯಾಂಕ್ಸ್


:-)